Ymeri: Konsumatorët në komunat me shumicë shqiptare paguajnë më shtrenjtë rrymën
Deputetja e LDK-së ngre shqetësimin për dallimet në tarifat e energjisë elektrike mes komunave.
Redaksia ZHURMA · · Përditësuar · 2 min lexim
Deputetja e Lidhjes Demokratike të Kosovës, Janina Ymeri, ka ngritur shqetësimin lidhur me dallimet në tarifat e energjisë elektrike mes komunave me shumicë shqiptare dhe atyre me shumicë serbe në veri të vendit. Ajo ka vënë në dukje se konsumatorët familjarë në komunat me shumicë shqiptare paguajnë deri në 22.4 për qind më shtrenjtë për faturat e rrymës krahasuar me banorët në veri.
Sipas të dhënave të paraqitura nga deputetja, për bllok-tarifën nën 800 kWh, konsumatorët në komunat me shumicë shqiptare paguajnë 9.05 cent për kWh, ndërsa ata në veri 7.4 cent, si dhe 3.88 cent krahasuar me 3.17 cent për kWh. Për pjesën tjetër, banorët jashtë veriut paguajnë 15.43 cent krahasuar me 13.73 cent, si dhe 7.28 cent krahasuar me 6.47 cent për kWh, shifra këto të nxjerra nga krahasimi me faturat e publikuara në uebsajtin e furnizuesit Elektrosever.
Ymeri ka drejtuar kritika të ashpra ndaj Qeverisë, duke e akuzuar për bartjen e një pjese të kostove të furnizimit me energji për veriun te konsumatorët e tjerë në Kosovë. Ajo ka theksuar se ndonëse shteti dhe kryeministri janë të njëjtë për të gjithë, qytetarët në komunat me shumicë shqiptare po vazhdojnë të përballen me barra më të rënda financiare në faturat e energjisë elektrike.