Ngrihen dyshime se Agjencia e Statistikave po e keqllogarit inflacionin
Formula e përdorur nga ASK-ja për matjen e inflacionit paraqet një hendek të madh krahasuar me shpenzimet reale të familjeve për ushqim.
Redaksia ZHURMA · · 2 min lexim
Agjencia e Statistikave e peshon ushqimin dhe pijet joalkoolike me rreth 33 për qind kur mat inflacionin, ndërsa të dhënat e vetë agjencisë tregojnë se kjo kategori merr 55 për qind të shpenzimeve të konsumit të familjeve kosovare. Në raportin e fundit mujor, ky institucion njoftoi se inflacioni në tetor arriti në 7.1 për qind krahasuar me periudhën e njëjtë të vitit të kaluar, duke matur çmimet në 13 kategori të ndryshme shpenzimesh.
Megjithatë, Anketa e Buxhetit të Ekonomive Familjare e vitit 2022 dëshmon se familjet shpenzojnë 55 për qind të buxhetit vetëm për ushqim dhe pije, derisa gjatë viteve 2025 dhe 2026 kësaj kategorie i është dhënë peshë rreth 32 për qind në llogaritje. Ligjëruesi Albian Krasniqi deklaroi se një hendek kaq i madh mund të nënkuptojë se matja nuk po bëhet drejt. «Pra është një diskrepancë e madhe në bazë të Anketës të Buxhetit të Ekonomive Familjare dhe peshës që e kanë vendosur në inflacion», u shpreh ai, duke shtuar se mungon një shpjegim zyrtar se pse është ulur pesha e produkteve ushqimore ndër vite.
Dallimi i Kosovës paraqitet i lartë edhe në raport me rajonin, ku diferenca mes shpenzimeve reale dhe peshës në indeks sillet nga 2 deri në 5 pikë përqindjeje, ndërsa në vend arrin në afër 23 pikë përqindjeje. Përfaqësuesit e institucionit nuk janë përgjigjur në pyetjet rreth bazës së formulës së peshave dhe mundësisë së deformimit të matjes.