Wizz Air hap bazë operative në Prishtinë — 100 milionë euro investim
Kompania do të nisë fluturimet e reja drejt Brukselit, Baden-Badenit dhe Bazelit nga nëntori i këtij viti me një aeroplan të ri Airbus A321neo.
PRISHTINË — Kompania e fluturimeve “Wizz Air” ka vendosur të hapë bazën e saj operative në Kosovë dhe të shtojë tri linja të reja fluturimi drejt qyteteve evropiane. Lajmi u bë i ditur gjatë një ceremonie të mbajtur në Aeroportin Ndërkombëtar të Prishtinës, ku u njoftua zgjerimi i afërt i operacioneve të tyre.
Sipas përfaqësuesve të këtij brendi të aviacionit, ky projekt kap vlerën e një investimi prej 100 milionësh dhe baza operative do të hapet zyrtarisht në nëntor. Për këtë qëllim do të vendoset një aeroplan i ri i tipit Airbus A321neo, i cili ka një kapacitet të plotë prej 239 ulësesh.
Linjat e reja do të përfshijnë fluturime tri herë në javë për në Bruksel, katër herë në javë për në Karlsruhe/Baden-Baden dhe fluturime të përditshme për në Bazel. Këto rrugëtime i shtohen gjashtë linjave ekzistuese që lidhin Prishtinën me Londrën, Dortmundin, Memmingenin, Bratislavën, Milanon dhe Romën.
Kryeministri në detyrë, Albin Kurti, deklaroi se ky vendim tregon se Kosova po shihet gjithnjë e më shumë si një vend i besueshëm për investime të huaja. Sipas tij, ky investim ndihmon integrimin e mëtejshëm të shtetit në rrjetet evropiane të transportit tregtar.
Burim: Epoka e Re
— Redaksia ZHURMA