Walker: Kosova do të shihet me sy tjetër pas verdiktit të Speciales

Diplomati amerikan në pension, William Walker, e ka quajtur “ditë të kobshme” vendimin e Gjykatës Speciale ndaj ish-krerëve të UÇK-së. Ai tha se është mërzitur shumë dhe e cilësoi atë si ditë të rëndë për Kosovën.

Walker, i cili drejtoi Misionin Verifikues të OSBE-së gjatë luftës në Kosovë, kritikoi Bashkimin Evropian duke pyetur se ku ishte para se të niste lufta, kur serbët i keqtrajtuan kosovarët. Ai përmendi dhunimet dhe trajtimet mizore, duke shtuar se nevojitej angazhimi i NATO-s, i Albrightit dhe i Clarkut.

Ai tha se liderët kosovarë të UÇK-së po gjykohen nga gjyqtarë e avokatë që nuk dinë asgjë për Kosovën. Walker shtoi se vendimi do të ndikojë rëndë në mënyrën se si ndërkombëtarët do ta shohin Kosovën në të ardhmen.