Vetëvendosja thirri seancën e Kuvendit për sot në 11:00

PRISHTINË — Vetëvendosja thirri vazhdimin e seancës konstituive të Kuvendit të Kosovës për sot në orën 11:00, ndonëse afati kushtetues kaloi mesnatën e 7 gushtit. Rendi i ditës i publikuar nga Kuvendi ka vetëm dy pika: zgjedhjen e kryetarit dhe të nënkryetarëve.

Mbrëmë deputetët opozitarë qëndruan deri rreth orës 00:00 në ambientet e Kuvendit, ndërsa dyert e sallës së seancave ishin të mbyllura. Ata kërkuan që seanca të vazhdonte atë natë, por kërkesa nuk u dëgjua nga Vetëvendosja.

Eugen Cakolli nga Instituti Demokratik i Kosovës e cilësoi caktimin e seancës për të shtunën shkelje të drejtpërdrejtë të Kushtetutës. Sipas tij, kryesuesi Avni Dehari kishte detyrim ta thërriste vazhdimin sot, në një kohë që do të mundësonte përfundimin e seancës deri në orën 23:59.

«Afati 48-orësh për pauzën është kufi procedural dhe zbatohet vetëm brenda afatit kushtetues», shkroi Cakolli në Facebook. Ai tha se Dehari, përmes caktimit të vazhdimit pas afatit, dhe LVV-ja, përmes mosushtrimit brenda afatit 30-ditor të së drejtës ekskluzive të propozimit, ua pamundësuan deputetëve ushtrimin e të drejtave kushtetuese.

Cakolli e cilësoi vendimin shkelje procedurale e kushtetuese dhe moszbatim të aktgjykimit të Gjykatës Kushtetuese. Ai kërkoi që së paku dhjetë deputetë t'i drejtohen asaj gjykate dhe të kërkojnë masë të përkohshme për pezullimin e seancës para orës 11:00. Legjitimiteti i seancës varet tani nga Gjykata Kushtetuese.

Burim: Nacionale
— Redaksia ZHURMA