Vota e diasporës i dha VV-së 53 mandate — çfarë i mbetet Kurtit për presidentin?

PRISHTINË — Kur rezultati preliminar e nxori Vetëvendosjen parti të parë me 42.91 për qind, Albin Kurti u shpreh i hapur për bashkëpunim me opozitën. Me 48 ulëse, ai nuk mund ta bënte as qeverinë e as të zgjidhte presidentin.

Pas numërimit të votave të diasporës, matematika ndryshoi. VV-së iu shtuan 5 deputetë, duke e çuar në 53 gjithsej. Bashkë me minoritetet joserbe, kjo i jep shumicën e thjeshtë prej 61 deputetësh për qeverinë.

Me këtë, ndryshoi edhe qëndrimi i Kurtit. Ai tash kufizon bashkëpunimin vetëm te çështja e presidentit. "Ne këtë nuk mund ta bëjmë vetëm, për shkak se nevojiten 80 veta aty në sallë", ka thënë ai, duke iu referuar një aktgjykimi të Gjykatës Kushtetuese.

Vota e diasporës doli vendimtare. "Diaspora vërtetë, ashtu siç pritej, e ndikoi shumë rezultatin e përgjithshëm, duke i hapur rrugë Kurtit që ta rrisë 'pazarin' për çështjen e Presidentit", ka deklaruar profesori Basri Muja. "Sepse, po të kishte vota më pak, do detyrohej mbase, që ta arrinte një koalicion për qeverinë, që do shërbente edhe për Presidentin."

Tani, me vetëm postin e Presidentit në "lojë", vlerësohet që rriten gjasat për një proces të ri zgjedhor. "Duke u bazuar në gjuhën e politikanëve dhe polarizimin, besoj se do jetë e vështirë të gjendet zgjidhje për presidentin, prandaj vendi mund të shkojë në zgjedhje", ka theksuar analisti Blerim Canaj. Kur janë numëruar gati 100% të votave, Vetëvendosje i ka siguruar 53 mandate, PDK 22, LDK 18 dhe Aleanca 7.

Burim: Gazeta Express, https://www.gazetaexpress.com/vota-e-diaspores-ndryshoi-matematiken-per-formim-te-institucioneve/
— Redaksia ZHURMA