Fyelli lab i Vendim Kapajt bëhet pjesë e filmit të Christopher Nolan

VLORË — Mjeshtri i fyellit, Vendim Kapaj, është bërë pjesë e kolonës muzikore të filmit më të ri të Christopher Nolan, "Odiseu". Instrumentisti vlonjat interpretoi me fyell për kompozitorin e projektit, Ludvig Goranson, i cili më pas i përfshiu këta tinguj labë në film.

Incizimet për muzikën e këtij filmi u realizuan në mjediset e teqesë së Kuzum Babait në Vlorë. Kapaj tregon se ka interpretuar për pesë orë rresht melodi shqiptare, duke filluar me vajet e Labërisë që janë kompozime të tij personale.

Kompozitori suedez mbeti i mahnitur nga tingujt e fyellit lab gjatë seancës në Vlorë. Mjeshtri tregon se Goransoni u përlot dhe i tha se ky interpretim i solli ndjesinë e vërtetë të personazhit të Odiseut, duke parë te ai frymën e këtij heroi.

Lajmi për përfshirjen e motiveve shqiptare në kolonën muzikore të filmit "Odiseu" u dha më 16 korrik 2026, pak para premierës botërore. Filmi i xhiruar në formatin IMAX nisi shfaqjen po atë ditë, duke ngjallur interesim të madh në tërë opinionin publik shqiptar.

Mjeshtri Kapaj interpretoi pjesë të këtij repertori të hënën, më 3 gusht, në hapje të festivalit "Etno Fest" në fshatin Kukaj të Prishtinës. Ky edicion i sivjetmë, i cili i kushtohet tërësisht kujtesës, mbledh çdo natë etno-performanca e shfaqje teatrore dhe do të mbyllet zyrtarisht më 10 gusht.

Instrumentisti u shpreh krenar që pas gjysmë shekulli lojë me instrumentin, mundi i tij po shpërblehet në skenën botërore. Kapaj theksoi se ndihet i lumtur që muzika e tij tradicionale tashmë po dëgjohet nga e gjithë shqiptaria dhe bota.

Burim: Kallxo
— Redaksia ZHURMA