Veliaj publikon ditarin e takimit me ministrin e Drejtësisë Gogu në burg

Kryebashkiaku i Tiranës, Erion Veliaj, ka bërë publik ditarin e tij nga takimi në burg me ministrin e Drejtësisë, Toni Gogu. Në shënimet e shfaqura, Veliaj ka prekur çështje të ndryshme, duke përfshirë transferimin e mundshëm në burgun e Fierit, protestat e ndryshme dhe çështjen e delegimit të Bashkisë së Tiranës, ndërsa ka përmendur gjithashtu avokatin e tij, Plarent Ndrecaj, për të cilin shprehu se i është bërë mik në kohë të vështira.

Sipas shënimeve të publikuara, Veliaj ka mohuar kategorikisht të jetë organizator apo financues i protestave të studentëve apo të grupeve të tjera, duke i cilësuar këto pretendime si gjepura të ngjashme me kohën e Enverit. Ai ka theksuar se nuk do të përkulet dhe nuk do të shantazhohet, qoftë edhe nëse dërgohet në burgun e Spaçi. Për më tepër, kryebashkiaku ka deklaruar se nuk do ta delegojë sërish Bashkinë e Tiranës, duke u shprehur se mandati i tij vjen nga Gjykata Kushtetuese dhe nga votat e qytetarëve të majtë, teksa ka shtuar se rikthimi i tij në krye të institucionit ka sjellë zhbllokimin e disa projekteve të rëndësishme.