Vdes një punëtor në Dubravë të Istogut, arrestohet përgjegjësi
Një punëtor ka humbur jetën pas lëndimeve në një objekt në Istog, ndërsa përgjegjësi është dërguar në mbajtje për 48 orë.
Redaksia ZHURMA · · Përditësuar · 1 min lexim
ISTOG — Një person ka humbur jetën pasi është lënduar në një objekt në fshatin Dubravë të Komunës së Istogut, ngjarje kjo e konfirmuar nga zëdhënësi i Policisë për rajonin e Pejës, Driton Rugova. Rasti ka ndodhur në mëngjes, ndërsa Policia është njoftuar rreth orës 08:40, duke dalë menjëherë në vendin e ngjarjes për të hetuar rrethanat e plota të incidentit. Sipas autoriteteve policore, viktima u dërgua pa shenja jete në Qendrën Kryesore të Mjekësisë Familjare në Istog, ku ekipi mjekësor konfirmoi vdekjen e tij.
Lidhur me këtë rast tragjik është njoftuar Prokurori i Shtetit, i cili ka urdhëruar që trupi i pajetë të dërgohet për obduksion në Institutin e Mjekësisë Ligjore në Prishtinë. Ndërkohë, rasti është iniciuar zyrtarisht si «Asgjësimi, Dëmtimi ose Heqja e Pajisjeve Mbrojtëse dhe rrezikimi i sigurisë në vendin e punës». Si pjesë e hetimeve, Policia ka intervistuar përgjegjësin e punëtorëve, i cili pas përfundimit të procedurave është dërguar në mbajtje për 48 orë.
