Izraelitët dhe amerikanët udhëtojnë në Valbonë — 12,195 turistë të huaj këtë sezon
Operatorët turistikë tregojnë se vizitorët e huaj qëndrojnë mesatarisht tri ditë dhe vizitojnë edhe jugun e vendit.
VALBONË — Izraelitët dhe amerikanët kryesojnë listën e vizitorëve të huaj që kanë zgjedhur luginën e Valbonës për këtë sezon turistik, sipas dëshmive të operatorëve lokalë. Sipërmarrësi turistik Klement Selimaj bën të ditur se interesi i tyre nuk kufizohet vetëm te Alpet shqiptare, por shtrihet gjithashtu në destinacione të ndryshme turistike në jug të vendit.
Vizitorët e huaj në këtë zonë malore qëndrojnë mesatarisht tri ditë. Sipas Selimajt, dëshira kryesore e turistëve është të eksplorojnë pjesën më të madhe të Alpeve dhe pjesën jugore, pasi nuk preferojnë të qëndrojnë gjatë në një vend të vetëm gjatë udhëtimit të tyre në Shqipëri.
Pavarësisht kënaqësisë së lartë me mikpritjen, ushqimin tradicional dhe akomodimin, mbetjet dhe pastërtia e mjedisit vazhdojnë të mbeten shqetësimi kryesor për turizmin. Selimaj thekson gjithashtu mungesën e aktiviteteve kulturore dhe sportive, të cilat do të ndihmonin në zgjatjen e kohëzgjatjes së qëndrimit të vizitorëve në luginë.
Të dhënat zyrtare tregojnë se Parku Kombëtar „Alpet e Shqipërisë“ u vizitua nga 24 mijë e 55 turistë gjatë muajve qershor dhe korrik, ku 12 195 prej tyre ishin shtetas të huaj, ndërsa 11 860 ishin vizitorë vendas.
Burim: Gazeta Metro
— Redaksia ZHURMA
