Si e dëmton vala e të nxehtit shëndetin mendor?

TIRANË — Temperaturat ekstreme që po përjetojmë këto ditë ndikojnë negativisht mbi organizmin, duke shkaktuar jo vetëm lodhje fizike dhe probleme kardiake, por edhe ezaurim mendor. Kjo situatë është veçanërisht kritike për personat që vuajnë paraprakisht nga probleme të shëndetit mendor.

Sipas të dhënave të OBSH-së, pritet që statistikat e vdekshmërisë nga të nxehtësia të përkeqësohen dukshëm, me një parashikim për dyfishim të humbjeve të jetës. Këto pasoja të jashtëzakonshme në shëndetin publik janë tashmë të dukshme, kryesisht në Francë, ku temperaturat kanë shënuar nivele alarmante.

Një studim i Universitetit Oxford mbi ndryshimet klimatike konfirmon se periudhat e valëve të nxehtisë shoqërohen me rritjen e shtrimeve në strukturat spitalore për shkaqe mendore. Konkretisht, numri i shtrimeve rritet me 9.7% në krahasim me periudhat me temperatura normale.

Rreziku për pacientët me probleme mendore është edhe më i lartë në kushte ekstreme, ku shkalla e vdekshmërisë shtohet deri në 3 herë më shumë. Kjo rritje e rrezikut lidhet me ndikimin e drejtpërdrejtë të temperaturave mbi stabilitetin psikologjik dhe fizik të këtyre individëve.

Nxehtësia e tepërt ndikon në kiminë e trurit, duke shkaktuar luhatje te neurotransmetuesit dhe modalitetet e komunikimit mes neuroneve. Gjithashtu, temperaturat e larta reduktojnë nivelet e oksigjenimit të trurit, duke ndikuar në funksionimin kognitiv dhe stabilitetin e gjendjes shëndetësore.

Faktorët socialë dhe biologjikë përkeqësojnë situatën, pasi rritja e temperaturave shoqërohet me reduktimin e socializimit dhe heqje dorë nga aktiviteti fizik. Gjithashtu, vështirësia për të fjetur gjatë këtyre periudhave është një nga faktorët esencialë që dëmton shëndetin mendor të qytetarëve.

Këto të dhëna vijnë në një kohë kur Europa po përballet me rekordet historike të temperaturave, me Spanjën që regjistron 212 viktima dhe Francën që detyrohet të mbyllë mijëra shkolla për të mbrojtur popullsinë nga efekti i të nxehtësisë.

Burim: ABC News
— Redaksia ZHURMA