U identifikua i vrari në Spanjë, Luka Beqiraj rezulton i dënuar për drogë në Itali

VLORË — Luka Beqiraj, 39-vjeçari nga Vlora i cili u ekzekutua me armë zjarri mesditën e së martës në Spanjë, rezulton të ketë qenë i dënuar në Itali me 4 vite e 6 muaj burgim dhe 24 mijë euro gjobë për trafik ndërkombëtar droge.

Vrasja e tij ndodhi më parë ndërsa 39-vjeçari ndodhej në tarracën e një lokali pranë kompleksit sportiv Playa Flamenca Sport Club, në Orihuela Costa brenda provincës së Alicantes. Një person i dyshuar u afrua me monopatinë elektrike, qëlloi disa herë mbi shqiptarin dhe u largua nga vendngjarja me të njëjtin mjet, duke mbetur ende në arrati.

Pas identifikimit të viktimës nga mediat shqiptare, doli në dritë se Luka Beqiraj ishte arrestuar në shkurt të vitit 2019 gjatë operacionit ndërkombëtar të koduar “Lulet e Pranverës”. Ky operacion u realizua me bashkëpunimin e autoriteteve shqiptare dhe atyre italiane, me fokus goditjen e disa grupeve të dyshuara për trafikimin e lëndëve narkotike nga Shqipëria drejt Italisë. Gjatë atyre hetimeve, strukturat ligjzbatuese sekuestruan sasi të konsiderueshme kanabisi si dhe lëndë të tjera narkotike. Më pas, në janar të vitit 2020, Gjykata e Leçes në Itali dha dënimin ndaj tij me burgim dhe gjobë monetare.

Lidhur me ngjarjen e fundit në territorin spanjoll, shërbimet policore mbërritën menjëharë në vendin e krimit, ndërsa hetimet për identifikimin dhe kapjen e autorit po drejtohen nga Guardia Civil. Autoritetet spanjolle njoftuan se deri më tani nuk kanë bërë të ditur një motiv zyrtar për ekzekutimin e 39-vjeçarit. Mes pistave që po ekzaminohen nga hetuesit është ajo e larjes së hesapeve, por kjo mundësi mbetet aktualisht e pakonfirmuar zyrtarisht prej tyre.

Hetimet po vazhdojnë nga Guardia Civil për të zbardhur plotësisht të gjitha rrethanat dhe shkaqet që çuan në vrasjen e Luka Beqirajt, teksa autori i dyshuar vijon të mbetet në kërkim.