Apeli i GJKKO-së e dënon me 7 vite e 4 muaj burg Oltion Bistrin

Gjykata e Posaçme e Apelit ndryshoi vendimin e shkallës së parë dhe dënoi përfundimisht me 7 vite e 4 muaj burgim ish-shefin e Forcave Operacionale, Oltion Bistrin. Trupi gjykues e shpalli atë fajtor për korrupsion dhe pastrim të produkteve të veprës penale, ndërsa vendosi edhe konfiskimin e pasurive të sekuestruara me vlerë mbi 1,3 milionë euro.

Në vendimin e shkallës së parë nga Gjykata e Posaçme kundër Korrupsionit dhe Krimit të Organizuar, Oltion Bistri ishte dënuar me 2 vite burgim vetëm për zbulim të akteve apo të dhënave sekrete, duke marrë pafajësi për akuzat e tjera, ndërsa u lirua në vitin 2025. Hetimet e Strukturës së Posaçme kundër Korrupsionit dhe Krimit të Organizuar nisën pas zbërthimit të komunikimeve me emra të koduar në aplikacionet Sky dhe Encro Chat, të cilat u morën nga autoritetet e drejtësisë në Francë, Belgjikë dhe Holandë. Sipas prokurorisë, të pandehurit e përfshirë në hetime kanë bashkëpunuar në episode kriminale gjatë viteve 2020-2021, ku koordinonin porosi për vrasje dhe mbanin kontakte me zyrtarë policie.

Gjykata e Posaçme e Apelit, me trup gjykues të përbërë nga relatori Dhimitër Lara dhe anëtarët Daniela Shirka e Engert Pëllumbi, caktoi 5 vite burgim për veprën penale të korrupsionit dhe 7 vite burgim për pastrim parash ndaj Bistrit. Në bashkim të dënimeve masa e caktuar ishte 11 vite burgim, por për shkak të aplikimit të gjykimit të shkurtuar masa përfundimtare u reduktua në 7 vite e 4 muaj heqje lirie. Po ashtu, Gjykata e Posaçme e Apelit urdhëroi konfiskimin e pasurive të sekuestruara ndaj tij, mes të cilave 3 apartamente, 2 biznese si dhe shumën prej 1,3 milionë eurosh.

Për të pandehurit e tjerë të procesit, Gjykata e Posaçme e Apelit la në fuqi dënimet e caktuara nga shkalla e parë. Sipas vendimit të gjykatës, Behar Brajoviç është dënuar me 8 vite e 8 muaj burgim, Edmond Preka me 7 vite burgim, Astmer Bilali me 5 vite e 8 muaj burgim, si dhe Xhevahir Lita me 3 vite e 4 muaj burgim, të gjithë me përfitim nga gjykimi i shkurtuar.

Sipas prokurorisë, Oltion Bistri ishte arrestuar më parë gjatë operacionit policor të koduar Metamorfoza, së bashku me ish-kryeprokurorin e Kukësit Xhevahir Lita dhe biznesmenin Pëllumb Gjoka. Sipas dosjes hetimore të prokurorisë, ish-zyrtari i policisë mbante komunikime telefonike me Ervis Martinajn gjatë kohës që drejtonte Forcat Operacionale, duke e njoftuar për aksionet që zhvilloheshin për kapjen e tij. Prokuroria argumenton gjithashtu se gjatë kohës kur drejtonte Komisariatin Numër 2, Bistri njoftonte biznesmenin Pëllumb Gjoka për kontrollet e policisë dhe e ka toleruar atë pas konstatimit të shkeljeve në biznesin e lojërave të fatit. Në kuadër të të njëjtit hetim janë arrestuar gjashtë persona, ndërsa nëntë të tjerë janë shpallur në kërkim, mes të cilëve anëtarë të fisit Bajri dhe shtetasi Ervis Martinaj.