Çfarë përmban marrëveshja ushtarake 4-milionëshe mes Turqisë dhe FSK-së?
Ejup Maqedonci dhe homologu turk Yaşar Güler nënshkruan sot Marrëveshjen e Bashkëpunimit Financiar Ushtarak me fond prej rreth 4 milionë eurosh.
PRISHTINË — Kosova dhe Turqia nënshkruan sot Marrëveshjen e Bashkëpunimit Financiar Ushtarak, sipas njoftimit të ministrit në detyrë të Mbrojtjes, Ejup Maqedonci. Nënshkrimi u realizua gjatë një takimi mes tij dhe ministrit të Mbrojtjes Kombëtare të Turqisë, Yaşar Güler.
"Sot, së bashku me Ministrin e Mbrojtjes Kombëtare të Republikës së Turqisë, z. Yaşar Güler, nënshkruam Marrëveshjen e Bashkëpunimit Financiar Ushtarak ndërmjet Qeverisë së Republikës së Kosovës dhe Qeverisë së Republikës së Turqisë", deklaroi Maqedonci.
Sipas marrëveshjes, qeveria turke do të mbështesë Kosovën me 200,000,000.00 lira turke — dyqind milionë, ose rreth 4 milionë euro. "Qeveria e Republikës së Turqisë do të mbështesë Qeverinë e Republikës së Kosovës me 200,000,000.00 TL (dyqind milionë lira turke, apo rreth 4 milionë euro), me qëllim fuqizimin e kapaciteteve të Forcës së Sigurisë së Kosovës dhe avancimin e mëtejshëm të saj institucional e profesional", theksoi ai.
Maqedonci theksoi se marrëveshja dëshmon nivelin e lartë të partneritetit ndërmjet dy vendeve dhe e cilësoi atë si hap konkret drejt bashkëpunimit afatgjatë. "Marrëveshja përfaqëson një dëshmi të qartë të partneritetit tonë strategjik dhe të gatishmërisë së përbashkët për ta forcuar më tej bashkëpunimin në mënyrë konkrete dhe afatgjate", tha ai.
Duke mbyllur deklaratën e tij, ministri theksoi se qëllimi fundor mbetet paqja dhe stabiliteti. "Ky bashkëpunim reflekton qartë nivelin e lartë të marrëdhënieve tona dhe vullnetin e përbashkët për t'i çuar ato edhe më tej në shërbim të paqes dhe stabilitetit", përfundoi Maqedonci.
Burim: Gazeta Express
— Redaksia ZHURMA