Trump dhe Melania festojnë Halloween-in në Shtëpinë e Bardhë

Presidenti amerikan Donald Trump dhe Zonja e Parë Melania Trump mirëpritën gjashtë mijë njerëz në South Lawn, duke u shpërndarë karamele dhe çokollata qindra fëmijëve të veshur me kostume në festimin vjetor të Halloween-it të organizuar në Shtëpinë e Bardhë. Të enjten, një radhë vizitorësh shtrihej përgjatë hyrjes së rezidencës, ku familja Trump nuk kishte veshur kostume, por u kujdes për shpërndarjen e ëmbëlsirave dhe bisedoi me prindërit e pranishëm.

Festimi i përvitshëm në Shtëpinë e Bardhë është kthyer në një traditë ku fëmijët dhe familjet e ftuara marrin pjesë në zakonin amerikan të shpërndarjes së ëmbëlsirave. Hyrja e rezidencës ishte e zbukuruar me kunguj, dredhka dhe një hënë gjigante artificiale, ndërsa një ushtarak performoi këngë klasike të festës. Eventi u zhvillua dy ditë përpara datës zyrtare të 31 tetorit, duke bashkuar vizitorë dhe figura të ndryshme të administratës së bashku me familjet e tyre.

Gjatë aktivitetit, fëmijët u paraqitën me kostume nga më të ndryshmet, duke imituar oficerë policie, ushtarë, pilotë garash, si dhe personazhe si Barbie, Tiger, Batman dhe figura të tjera. Trump pozoi për fotografi me të vegjlit dhe u tregua i gatshëm për të dhënë autografe, duke firmosur kostumet e dy fëmijëve të veshur si pilotë garash, ndërsa një foshnje u maskua si fletë votimi. Në mesin e të pranishmilor ishin edhe Sekretari i Mbrojtjes Pete Hegseth, zëvendësshefi i stafit Stephen Miller dhe Përfaqësuesi i Tregtisë Jamieson Greer.

Momenti më i veçantë i ngjarjes ishte kalimi në lartësi të ulët i avionit presidencial Air Force One, zhurma e të cilit bëri që presidenti dhe zonja e parë të ngrinin kokën, ndërsa në sfond dukej Monumenti i Uashingtonit. Pas rreth një ore, pasi Trump kërceu lehtë nën ritmet e këngës me temë nga filmi «Ghostbusters», çifti u rikthye brenda ambienteve të Shtëpisë së Bardhë.