Tre anëtarë të një familjeje nga Kosova humbën jetën në Gjermani
Viktimat janë të moshës 63, 34 dhe 16 vjeçare, të cilët po ktheheshin nga pushimet në Kosovë për në shtetin gjerman ku jetonin.
NITTENDORF — Tre persona nga Kosova kanë humbur jetën tragjikisht në një aksident të rëndë rrugor të ndodhur në Gjermani mëngjesin e së enjtes, 6 gusht 2026. Viktimat, të cilët po udhëtonin me veturë për t'u kthyer nga pushimet në Kosovë drejt vendit ku jetonin, ishin që të tre anëtarë të së njëjtës familje.
Lajmin e rëndë për vdekjen e tyre e ka konfirmuar familjari i viktimave, Ramiz Aliu. Ai sqaroi se autoritetet gjermane kontaktuan djalin e tij përmes telefonit për t'i njoftuar. Viktimat e kësaj tragjedie janë vëllai i tij 63-vjeçar, djali i vëllait 34-vjeçar dhe nipi i tij 16-vjeçar.
Aliu tregoi se komunikimin e fundit me familjarët e tij e pati saktësisht në orën 6:15 të mëngjesit. Sipas tij, tragjedia ndodhi vetëm pak minuta më vonë, duke shkaktuar humbjen e tre anëtarëve të familjes Aliu që po ktheheshin në Gjermani.
Burim: Zëri
— Redaksia ZHURMA