Tre alpinistë evakuohen nga Mali Bistrica pas urgjencës mjekësore

TETOVË — Qendra për Menaxhim me Kriza (QMK) evakuoi tre alpinistë nga mali Bistrica më 12 korrik, pasi njëri prej tyre gjatë ecjes shfaqi probleme serioze shëndetësore, duke përfshirë dhimbje në gjoks, vështirësi në frymëmarrje dhe vështirësi në lëvizje, jo për shkak të lëndimeve.

Njoftimi arriti në Qendrën Rajonale për Menaxhim me Kriza (QRMK) në Tetovë në orën 18:46 përmes Numrit Unik për Thirrje Emergjente 112, duke treguar se grupi prej tre alpinistësh kishte mbetur i bllokuar në një terren të vështirë dhe të paarritshëm, pa qasje me automjet terreni, dhe për të arritur tek ata nevojiteshin të paktën tre deri në katër orë ecje.

Menjëherë pas pranimit të njoftimit, QMK-ja përmes QRMK-së Tetovë vendosi koordinim me SPB Tetovë, Ndihmën e Shpejtë Mjekësore, Drejtorinë për Mbrojtje dhe Shpëtim – Tetovë dhe Parkun Nacional "Mali Sharr", duke përfshirë në aksion një alpinist-shpëtimtar, anëtar të Ekipit për Ndërhyrje të Shpejtë dhe Shpëtim në Mal, i cili u nis menjëherë drejt vendndodhjes.

Gjatë gjithë aksionit, QMK-ja përmes QRMK-së Tetovë mbajti komunikim të vazhdueshëm me personat që kërkuan ndihmë dhe koordinoi punën e të gjitha institucioneve kompetente, në përputhje me Procedurat Standarde Operative për shpëtimin e personave në rrezik për jetën.

Pas mbërritjes së alpinistit-shpëtimtar te grupi, në konsultim me ekipin e Ndihmës së Shpejtë Mjekësore u bë vlerësimi i gjendjes shëndetësore dhe u konstatua se personi mund të lëvizte në mënyrë të sigurt me shoqërimin e shpëtimtarit deri në një pikë të qasshme. Në atë pikë, alpinistët u pritën nga zyrtarët policorë dhe ekipi mjekësor, pas së cilës u transportuan në Spitalin Klinik të Tetovës për ekzaminime të mëtejshme mjekësore.

Më vonë, Stacioni Policor i Tearcës njoftoi se personat kishin mbërritur të sigurt në fshatin Leshok, ku ekipi i Ndihmës së Shpejtë Mjekësore i ofroi ndihmën e parë personit për shkak të gjendjes shëndetësore të të cilit ishte organizuar aksioni. Pas kontrolleve mjekësore u konstatua se personat nuk kishin pësuar lëndime dhe, pas marrjes së ndihmës mjekësore, u liruan për trajtim në shtëpi.

Burim: TV21
— Redaksia ZHURMA