Drita dhe Prishtina përballen sot në ndeshjen e prapambetur të Superligës

GJILAN — Skuadra gjilanase dhe ajo e Prishtinës do të matin forcat sot, të mërkurën, në takimin e mbetur të xhiros së dytë për Albi Mall Superligën e Kosovës. Fërshëllima e parë e kësaj sfide, e cila ishte shtyrë për shkak të angazhimeve evropiane gjatë verës, është caktuar të bie në orën 13:00 në stadiumin me bari artificial të qytetit të Gjilanit.

Vendasit hyjnë në këtë përballje pas një ecurie prej katër fitoresh radhazi, me synimin për të arritur suksesin e pestë që do t'i barazonte me pikë pikërisht me kundërshtarin e sotëm dhe do t'i afronte vetëm një pikë larg kryesuesve të Malishevës. Nga ana tjetër, bardhekaltërit nga kryeqyteti vijnë me një bilanc të përzier nga pesë paraqitjet e fundit, ku regjistrojnë dy fitore, dy barazime dhe një humbje, por synojnë rezultat pozitiv për të ruajtur epërsinë ndaj gjilanasve dhe për të synuar kreun e tabelës.