Pse Toshkovski thekson se siguria është prioriteti më i lartë?

SHKUP — Që nga dita e parë e kemi marrë përsipër detyrimin që siguria të jetë prioritet më i lartë, tha sot në mëngjes ministri i Punëve të Brendshme, Pançe Toshkovski, duke dhënë llogari për punën e dy viteve të kaluara në Qendrën për Trajnim në Idrizovë.

Gjatë dy viteve të kaluara u përballëm me sfida të shumta të sigurisë, por dëshmuam se me përkushtim, integritet dhe bashkëpunim ndërkombëtar, mund të arrihen rezultate të dukshme, shtoi Toshkovski. “Kemi investuar në pajisje, trajnime dhe teknologji të reja. Raporti i sotëm nuk është vetëm një deklaratë shifrash, por një konfirmim faktik i punës dhe profesionalizmit të nëpunësve të policisë dhe të gjithë punonjësve në MPB,” theksoi ai.

MPB i fuqizoi kapacitetet institucionale dhe e avancoi luftën kundër krimit të organizuar dhe korrupsionit, theksoi ai. “Jam i vetëdijshëm se ende ka shumë punë përpara nesh, siguria është proces që kërkon shumë përkushtim. Prandaj, do të vazhdojmë me të njëjtën energji, vizion të qartë dhe vendosmëri për të ndërtuar MPB moderne që do t’u përgjigjet sfidave,” nënvizoi Toshkovski.

Të jesh pjesëtar i MPB-së nuk është vetëm profesion, por nder dhe përgjegjësi, tha ai, duke shtuar se “Qëndrojmë për çdo ditë në shërbim të qytetarëve dhe shtetit. Qëllimi ynë është shtet i sigurt, sistem i qëndrueshëm dhe institucione të fuqishme”. Ministri theksoi se nuk ka të paprekshëm dhe selektivitet, pa dallim të funksionit, pozitës dhe vendit të punës. “Vetëm duke respektuar ligjet dhe duke i trajtuar të gjithë në mënyrë të barabartë do të arrijmë rezultate,” përfundoi ai.

*Burim: Gazeta Express*
— Redaksia ZHURMA