Tetova mirëpret garën e çiklizmit Sharr Cup

Tetova ka mirëpritur dhjetëra çiklistë nga vendet e rajonit, por edhe nga Zvicra, të cilët kanë sfiduar shtigjet e Malit Sharr në kuadër të garës Sharr Cup. Kjo ngjarje bashkon çiklistë nga Maqedonia e Veriut, Kosova, Bullgaria dhe Zvicra, me qëllim promovimin e sportit, natyrës dhe potencialit turistik të rajonit.

Kryetari i Komunës së Tetovës, Bilall Kasami, ka theksuar rëndësinë e këtij organizimi, duke deklaruar se rreth 50 çiklistë janë bërë pjesë e garës. Sipas tij, vizioni për qytetin dhe Malin Sharr synon ta kthejë Tetovën në një destinacion për aktivitete sportive, kulturore dhe turistike gjatë gjithë vitit.