Si do të takshen banesat shqiptare sipas vlerës reale të tregut?

TIRANË — Ministria e Financave ka hedhur për konsultim publik projektligjin e ri "Për taksën mbi pasurinë e paluajtshme", një nismë që synon të zëvendësojë sistemin aktual të taksimit të pronës — i bazuar kryesisht në sipërfaqe dhe çmime reference — me një model të ri të lidhur drejtpërdrejt me vlerën reale të tregut.

Reforma ndryshon rrënjësisht logjikën fiskale. Baza e llogaritjes do të jetë vlera e pronës, jo më sipërfaqja e saj. Kjo, sipas dokumentit, synon të rrisë "drejtësinë fiskale" — barra tatimore do të reflektojë më saktë vlerën e pronës dhe aftësinë paguese të qytetarëve.

Normat janë të kufizuara me ligj. Për ndërtesat e banimit, taksa lëviz në intervalin 0,1% deri në 0,2% të vlerës së pronës. Për tokën dhe kategoritë e tjera, normat variojnë sipas përdorimit deri në rreth 0,25%. Lehtësime parashikohen për banesën e parë dhe për kategori sociale të caktuara.

Zbatimi do të kryhet me faza: fillimisht për ndërtesat në vitin 2029, për tokën në vitin 2031. Deri atëherë mbetet në fuqi sistemi aktual. Gjithashtu parashikohet krijimi i një Kadaste Fiskale dhe një strukturë qendrore që do të mbështesë bashkitë në administrimin e taksës.

Ministria e Financave vlerëson se pas implementimit të plotë, të ardhurat nga kjo taksë mund të arrijnë 0,7% deri në 1% të PBB-së, nga niveli aktual prej rreth 0,28% — pothuajse trefishim. Kjo do ta kthente taksën në një nga burimet kryesore të financimit të pushtetit vendor dhe investimeve publike në nivel bashkish.

Burim: ATSH, https://ata.gov.al/2026/06/17/projektligjin-e-ri-per-taksen-e-prones-taksim-mbi-vleren-e-tregut-me-norma-01-02-per-banesat/
— Redaksia ZHURMA