Tahiri: Gjyqi në Hagë ndaj ish-krerëve të UÇK-së nuk ka lidhje me drejtësinë

Deputeti i Partisë Demokratike të Kosovës, Arian Tahiri, ka deklaruar se gjykimi në Hagë ndaj ish-krerëve të Ushtrisë Çlirimtare të Kosovës nuk ka të bëjë me drejtësinë, por me përmbysjen e historisë dhe ndërtimin e një narrative të rreme për vendin. Gjatë fjalimit të tij në Kuvendin e Kosovës në gjashtëvjetorin e arrestimit të tyre, ai ka theksuar se kjo çështje i tejkalon dallimet politike dhe partiake, duke e cilësuar si një betejë kombëtare, shtetërore dhe historike që kërkon unitet.

Tahiri u ka bërë thirrje institucioneve dhe bashkësisë ndërkombëtare, veçanërisht Bashkimit Evropian, duke kërkuar që të mbrohet drejtësia nga çdo ndikim dhe standard i dyfishtë. Sipas tij, procesi ndaj Hashim Thaçit, Kadri Veselit, Jakup Krasniqit dhe Rexhep Selimit po hyn në vitin e shtatë të pritjes, ndërsa Kosova pret përgjigje për transparencë, llogaridhënie dhe respektim të të drejtave të njeriut.