Krasniqi: Katër ish-krerët e UÇK-së u dënuan për postet politike që bartën

Deputeti i Partisë Demokratike të Kosovës, Altin Krasniqi, djali i ish-zëdhënësit të Ushtrisë Çlirimtare të Kosovës dhe ish-kryetarit të Kuvendit, Jakup Krasniqi, ka kundërshtuar nga foltorja e Kuvendit të Kosovës aktgjykimin e Gjykatës Speciale ndaj katër ish-krerëve të UÇK-së në gjashtëvjetorin e arrestimit të tyre, duke e cilësuar vendimin si padrejtësi me pasoja të mëdha afatgjata për vendin.

Në seancën e Kuvendit, deputeti Krasniqi deklaroi se dënimet ndaj Hashim Thaçit, Jakup Krasniqit, Kadri Veselit dhe Rexhep Selimit ndërlidhen me pozitat politike që kishin mbajtur gjatë luftës dhe jo me përgjegjësi individuale të dëshmuara. Më 16 shtator, Gjykata Speciale në Hagë dënoi Hashim Thaçin me 25 vjet burgim, Jakup Krasniqin me 25 vjet, Kadri Veselin me 18 vjet dhe Rexhep Selimin me 13 vjet.

Sipas deputetit të PDK-së, përmes këtij procesi gjyqësor po synohet të njollosen objektivat e Drejtorisë Politike të UÇK-së, të cilat ishin liria dhe pavarësia e Kosovës. Krasniqi paralajmëroi se vendet kundërshtare të shtetësisë së Kosovës mund ta shfrytëzojnë këtë aktgjykim në ofensivat e tyre diplomatike për të kriminalizuar të gjithë luftën çlirimtare dhe jo vetëm personat e dënuar.

Gjatë fjalës së tij, ai kërkoi nga institucionet shtetërore të mbrojnë të vërtetën e luftës së UÇK-së dhe iu bëri thirrje subjekteve politike që t'i lënë mënjanë dallimet partiake përballë këtyre vlerave. Krasniqi po ashtu përmendi se persona nga kategori të ndryshme, përfshirë përfaqësues ndërkombëtarë dhe familjarë të viktimave, kishin dhënë dëshmi në mbështetje të pafajësisë së të akuzuarve.

«Më 16 shtator 2026, nuk u dënuan Jakup Krasniqi, Hashim Thaçi, Kadri Veseli dhe Rexhep Selimi për veprimet e tyre apo për përgjegjësitë e tyre individuale. U dënuan për shkak të posteve politike që ata kishin bartur…Kjo ka vetëm një arsye, duan t’i përlyejnë dhe baltosin objektivat e UÇK-së, objektivat e kësaj drejtorie politike, të cilat ishin të njëjta ndër breza, liria dhe pavarësia e Kosovës, liri kjo e pavarësi që u arritën me shumë mund e gjak. Pasojat e 16 shtatorit ndoshta nuk i ndjeni tani, por pasojat afatgjate ndihen pas një kohe më të gjatë, pikërisht për faktin se janë pasoja të mëdha», deklaroi Krasniqi.

«Imagjinoni ofensivën diplomatike që do të zhvillohet nga vendet kundërshtare të pavarësisë sonë, të cilat nuk janë të pakta. E këto vende nuk do të flasin për dënime individuale, por do të flasin për dënimin dhe kriminalizimin e një lufte çlirimtare, siç ishte ajo e UÇK-së. Pavarësisht, se më 16 shtator tha se UÇK-ja nuk ishte në gjyq, ajo çka ai lexoi vetëm se e demantoi ai deklarim. Ata sot janë pengje të një ‘drejtësie ndërkombëtare’, e cila, me plot meritë, vetëm padrejtësi është. Institucionet e Kosovës e kanë për obligim ta mbrojnë të vërtetën e luftës së UÇK-së, prandaj, ju ftoj të gjithëve që, kur është në pyetje UÇK-ja dhe vlerat e saj, t’i lëmë anash dallimet politike», shtoi ai.