Pse SVP-ja zvicerane lidh imigracionin me bllokimet e trafikut?
Partia e djathtë zvicerane thotë se 100 mijë shtetas të huaj çdo vit i shtojnë 55 mijë orë kolonash udhëtarëve zviceranë.
ZVICËR — Partia e djathtë zvicerane Swiss People’s Party (SVP) ka intensifikuar fushatën për iniciativën “Jo 10 milionëve”, duke argumentuar se imigracioni po mbingarkon rrugët e vendit.
Sipas deputetes së SVP-së, Stefanie Heimgartner, rreth 100 mijë shtetas të huaj që vendosen çdo vit në Zvicër kontribuojnë në rritjen e bllokimeve në trafik. Ajo pretendon se kjo i shton drejtuesve të automjeteve afro 55 mijë orë shtesë në kolona çdo vit.
Heimgartner e ka kualifikuar situatën si barrë të konsiderueshme për ekonominë, jo vetëm shqetësim për udhëtarët. “Sistemi po përballet me mbingarkesë, bllokime dhe kosto në rritje”, ka thënë ajo.
Deklaratat vijnë në kuadër të debatit për iniciativën e SVP-së për kufizimin e rritjes së popullsisë në Zvicër, temë që vazhdon të ndajë partitë dhe opinionin publik.
Burim: Gazeta Express
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.