Superkompjuteri sheh Arsenalin kampion sërish, me 45% gjasa

LONDËR — Superkompjuteri i platformës “Compare.bet” parashikon se Arsenali do ta fitojë titullin e Premierligës edhe në sezonin 2026-27, sezoni i dytë radhazi, diçka që londinezët nuk e kanë arritur që nga mesi i viteve 1930, sipas 10.000 simulimeve të plota të kampionatit.

Modeli i jep Arsenalit 45 për qind gjasa për ta mbrojtur titullin. Manchester City renditet e dyta, vetëm tri pikë pas kampionëve në fuqi, ndërsa Liverpooli parashikohet i treti, 11 pikë pas qytetasve.

Chelsea zë vendin e katërt, katër pikë pas Liverpoolit. Aston Villa, që e mbylli sezonin e kaluar në vendin e katërt, zbret në të pestën dhe do t’i duhej një vend shtesë evropian nga Premierliga për të luajtur sërish në Ligën e Kampionëve.

Befasia më e madhe mbetet Manchester United. Pas vendit të tretë sezonin e kaluar, “Djajtë e Kuq” parashikohen të bien në të gjashtën, me vetëm 3.5 për qind gjasa për titullin, megjithëse konsiderohen më afër kualifikimit në Ligën e Kampionëve sesa jashtë saj.

Vetëm Arsenali, Manchester City (38 për qind) dhe Liverpooli (11 për qind) kanë probabilitet real për ta ngritur trofeun në maj. Plot 12 skuadra të tjera kanë zero për qind gjasa, sipas modelit matematikor.

Në fund të tabelës, Hull City, Ipswich Town dhe Coventry City parashikohen të bien nga Premierliga. Shancet për rënie janë 84 për qind për Hull, 68 për qind për Coventry dhe 54 për qind për Ipswich. Hull parashikohet të mbyllë sezonin me vetëm 19 pikë, në nivel me Sunderlandin e sezonit 2002-03 dhe Portsmouthin e vitit 2009-10, që humbi nëntë pikë për shkak dënimi.

Simulimi bazohet te renditjet Elo të çdo skuadre, të përditësuara në mënyrë dinamike sipas performancës mbi ose nën pritshmëritë e xG, si dhe te analiza e sentimentit dhe të dhënat nga tregu i basteve, thuhet në shpjegimin e “Compare.bet”. Superkompjuteri e simuloi sezonin e ardhshëm 10.000 herë për të nxjerrë këto probabilitete.

Burim: Ekonomia Online
— Redaksia ZHURMA