Sulmohet sërish gazetari i shoubizit Elton Tozaj

Gazetari i shoubizit, Elton Tozaj, ka ngritur shqetësim te ndjekësit e tij pas publikimit të një fotografie në rrjetet sociale, përmes së cilës ka treguar se është përballur me një tjetër sulm. Në foton e publikuar në InstaStory, ai shfaqet me kokën e mbështjellë me fasha dhe me njolla gjaku në veshje. Pamja është shoqëruar me një mesazh ku gazetari shpreh zemërimin ndaj personave që, sipas tij, qëndrojnë pas ngjarjes, duke shkruar: «Kushdo që e bëri këtë do ta paguajë shumë shtrenjtë! Nuk më ndalni dot».

Ky postim ka ngjallur reagime, pasi nuk është hera e parë që ai raporton për një përvojë të dhunshme, ndërkohë që në dhjetor të vitit të kaluar ishte dhunuar fizikisht dhe kishte pësuar lëndime serioze. Deri më tani nuk janë publikuar detaje të tjera mbi rrethanat e pretenduara të sulmit apo identitetin e personave të përfshirë.

Siç raportoi Zhurma më 3 nëntor 2026, aktori Gazmend Paja kishte dorëzuar kallëzim penal në Prokurorinë e Tiranës ndaj krijuesit të përmbajtjes Elton Tozaj, me pretendimin se ky i fundit e kishte përndjekur dhe fyer në rrjetet sociale.