Big Brother VIP Albania: Ftesë në 5 rikthen diskutimet për sezonin e ri

Moderatori i Big Brother VIP Albania, Ledion Liço, ka ndezur kureshtjen e fansave me një postim në rrjetet sociale që përmbante fjalinë “Thonë se ju ka marrë malli”. Ky sinjal ka nxitur diskutimet rreth edicionit të ri të spektaklit, megjithëse ende nuk ka një datë zyrtare të konfirmuar për nisjen e tij. Diskutimi u vazhdua në pjesën e dytë të emisionit “Ftesë në 5”, të moderuar nga Bieta Sulo, ku të ftuarit ndanë pritshmëritë e tyre për personazhet që mund të bëhen pjesë e shtëpisë së famshme.

Ardi Borova hodhi një ide për mënyrën se si ky sezon mund të ndërveprojë me publikun, duke propozuar që spektakli të ketë surprizat e tij edhe jashtë shtëpisë, si në restorante. “Do më pëlqente fakti se si sivjet mënyra e të qenurit nga televizioni brenda familjes ndoshta mund të qaset në një mënyrë tjetër, jo vetëm me personazhe, por edhe me ndonjë surprise. Je duke parë Bigun, të bie dera, hapet dera, të vjen kamera e Topit dhe të thotë: Çfarë je tu pa Bigun?”, u shpreh Ardi. Ky koment shkaktoi të qeshura në studio, ndërsa u diskutua edhe mundësia e rikthimit të Arbër Hajdarit në rolin e opinionistit. “Kam dëgjuar një thashethem që po më thonë se mund të jem edhe unë pjesë e Big Brother”, tha njëri prej të pranishmëve, duke treguar se zërat për pjesëmarrësit kanë nisur të qarkullojnë.

Në studio u prezantua një listë me emra që kanë qarkulluar në rrjetet sociale si kandidatë të mundshëm për sezonin e ri. Desjana Rapaj veçoi Bujar Qamilin dhe Fero-n si më interesantë për formatin, ndërsa për Robert Berishën u shpreh me humor: “Te Roberti nuk po futem shumë, se Roberti është vetëm si të bëj si i bukur ashtu. Hajde, mirupafshim!”. Komenti për pamjen e këngëtarit solli edhe një batutë: “Gjyshja ime më ka thënë: Bashkëshorti duhet të jetë pak më i bukur se majmuni”.

Ardi Borova shprehu dyshime se shumica e emrave të përmendur do ta përballonin gjatë gjatë izolimit, ndërsa për Mira Konçin u diskutua nëse mosha dhe angazhimet familjare do ta vështirësonin pjesëmarrjen. Oksana kundërshtoi këtë mendim, duke theksuar se mosha nuk është domosdoshmërisht pengesë. “Po pse moshën e shihni? Mund të varet nga aftësia, nga ambicia, nga tipi, çfarë karakteri ke?”, ishte reagimi i saj. Viola Spiro dhe Deta Kokomani ishin dy emra të tjerë të komentuar, me diskutime rreth dinamikës që mund të krijohej nëse dy personazhe me profile të ndryshme do të përballeshin me të njëjtën eksperiencë.