Stuhia dëmton shkollën në Gadime dhe rrëzon shtylla elektrike në Lipjan

LIPJAN — Reshjet e dendura të shiut dhe erërat e forta që përfshinë territorin e Lipjanit shkaktuan dëme në infrastrukturën publike dhe në sektorin e bujqësisë. Komuna e Lipjanit njoftoi se dëmet prekën shkollën në Gadime, Sallën Sportive, shtigjet e ecjes dhe disa zona të tjera të komunës.

Sipas Komunës, erërat rrëzuan disa drunj përgjatë shtigjeve të ecjes, duke paraqitur rrezik të drejtpërdrejtë për kalimtarët. Në disa lokalitete u dëmtuan dhe u rrëzuan edhe shtylla elektrike, duke shkaktuar ndërprerje të furnizimit me energji elektrike.

Ekipet e shërbimeve publike, në bashkëpunim me strukturat emergjente dhe institucionet përkatëse, dolën menjëherë në terren për të vlerësuar situatën, thuhet në njoftimin e Komunës. Ato po punojnë në sanimin e dëmeve dhe largimin e pengesave, me qëllim garantimin e sigurisë së qytetarëve dhe rikthimin e gjendjes në normalitet.

Komuna u bëri thirrje qytetarëve të tregojnë kujdes të shtuar gjatë lëvizjes në zonat e prekura dhe të shmangin qëndrimin pranë objekteve, pemëve dhe shtyllave të dëmtuara, të cilat mund të paraqesin rrezik për sigurinë e tyre. Rekomandimi vlen edhe për ditët në vijim.

Parashikimet meteorologjike sinjalizojnë se në ditët në vijim priten reshje intensive dhe erëra po aq të fuqishme. Kushtet e vazhdueshme të këqija të motit e rrisin urgjencën e punëve për sanimin dhe sigurimin e zonave tashmë të prekura në Lipjan.

Burim: Lajmi.net
— Redaksia ZHURMA