Stadiumi i Librazhdit gati për Kategorinë e Parë

Një vizitë inspektuese në stadiumin e Librazhdit është kryer nga zyrtarë të Federatës Shqiptare të Futbollit. Qëllimi ishte verifikimi i kushteve dhe standardeve që kërkohen për zhvillimin e ndeshjeve të Kategorisë së Parë.

Klubi i Sopotit dhe Bashkia e Librazhdit kanë punuar së bashku gjatë javëve të fundit për një sërë ndërhyrjesh në infrastrukturën e stadiumit, me synim përshtatjen e tij me kriteret e licencimit.

Ndër punimet e realizuara përmenden përmirësimi i dhomave të zhveshjeve dhe pankinave, vendosja e platformave për kamerat e transmetimit të ndeshjeve, si dhe përmirësimi i kushteve për tifozët. Gjithashtu, është ndërhyrë në fushën e lojës, e cila tashmë është sjellë në parametra optimalë.

Pas inspektimit dhe verifikimit të kushteve, Sopoti pritet t'i luajë ndeshjet në shtëpi në këtë stadium.