SPAK kërkon psikolog dhe mjete pune për hetuesit e BKH-së

Prokuroria e Posaçme ka kërkuar punësimin e një psikologu institucional gjatë vitit 2027 për të mbështetur stafin e Byrosë Kombëtare të Hetimit, i cili përballet me ngarkesë të lartë pune, kërcënime dhe presione psikologjike gjatë veprimtarisë hetimore. Kërkesa u bë publike gjatë raportimit të SPAK në Komisionin për Nismat Qytetare, Bashkëpunimin dhe Mbikëqyrjen Institucionale për projektbuxhetin e vitit 2027, ku u diskutuan nevojat e institucionit.

Drejtori i Buxhetit dhe Menaxhimit Financiar në Prokurorinë e Posaçme, Armand Shini, shpjegoi se psikologu do të ndihmojë stafin dhe do të asistojë gjatë intervistimit të dëshmitarëve të rrezikuar e bashkëpunëtorëve të drejtësisë. Sipas Shinit, «psikologia institucionale është një kërkesë e shtuar, e cila është argumentuar me ndihmën që do të japë psikologu edhe për stafin e BKH-së». Prokurori i SPAK, Alfred Shehu, shtoi se buxheti i institucionit për vitin 2027 është rreth 2.3 miliardë lekë, ndërsa nevojat e rishikuara arrijnë në 2.5 miliardë lekë, ku diferenca lidhet me shtimin e 25 pozicioneve të reja dhe pagesat për gatishmëri e orët jashtë orarit.

Gjatë prezantimit, Shehu bëri të ditur se janë parashikuar 15 milionë lekë për pajisje zyrash si kasaforta, grirëse letrash, mobilje dhe pajisje mbështetëse. Për më tepër, janë planifikuar 30 milionë lekë për blerjen e tetë automjeteve dhe 174 milionë lekë për infrastrukturë teknologjike e pajisje elektronike. Aktualisht, struktura organike parashikon 339 pozicione, por vetëm 220 janë të plotësuara, duke lënë 119 vende vakante, ndërsa institucioni ka kërkuar 25 pozicione të jafta shtesë.