Gerond Meçe: U mora peng dhe u kërcënova për tenderat e AKSHI-t

Administratori i kompanisë «Advanced Business Solutions ABS», Gerond Meçe, ka dëshmuar se u mor peng nga persona të maskuar që hiqeshin si efektivë të Policisë dhe të BKH-së, për shkak të procedurave të tenderimit dhe ankimimeve ndaj AKSHI-t. Ngjarja e rëndë u trajtua në emisionin «Në Shënjestër» të gazetares Klodiana Lala, ku u zbardh rrëfimi i plotë i biznesmenit për orët e kaluara nën terror dhe presion të lartë.

Sipas dëshmisë së tij të dhënë në dokumentar, kompania «ABS» ku ai është ortak i vetëm dhe administrator që nga viti 2006 ka marrë pjesë rregullisht në tenderat e teknologjisë dhe informacionit të zhvilluara nga Agjencia Kombëtare e Shoqërisë së Informacionit prej vitit 2016. Vetëm nga janari deri në korrik, sipas të dhënave të paraqitura, kjo kompani kishte ankimuar afërsisht 20 procedura prokurimi në AKSHI, por edhe në institucione të tjera si KLGJ dhe UKT, pas skualifikimeve nga gara që kishte pësuar herë pas here.

Detajet e rrëmbimit të datës 12 gusht 2025 tregojnë se Meçe ka qenë në shtëpi deri rreth orës 10:30 paradite, ndërsa kur është afruar te makina e tij është ndalur nga një fuoristradë «Range Defender» e zezë me targa AC121 JJ dhe fenelina policie. Sipas rrëfimit të tij, një person me jelek të verdhë dhe mbishkrimin BKH i është afruar duke i thënë «Jemi SPAK-u, duhet të vish me ne, hyr në makinë», ndërsa shoferi i maskuar ka urdhëruar marrjen e dy çantave nga bagazhi. Më pas, ndërsa makina ka marrë drejtimin për nga Elbasani përmes rrugës së vjetër në fshatin Krrabë, atij i janë vënë prangat dhe i është kërkuar fjalëkalimi i telefonit, duke u shoqëruar edhe me goditje me shpullë nga shoferi kur ai ka refuzuar. Në dëshminë e tij përmenden gjithashtu komunikimet që pengmarrësit bënin herë pas here nga telefoni i tij me administratorin tjetër të kompanisë për të tërhequr ankimimet, si dhe dyshimet e tij për përfshirjen e biznesmenit Ermal Beqiri, të cilit i atribuohet ndikimi lidhur me ambientet e biznesit të Agasit në prani edhe të drejtoreshës së AKSHI-t, Mirlinda Karçanaj.

Në vijim të rrëfimit, biznesmenit i është kërkuar prerazi heqja dorë nga procedurat e ankimuara që llogariteshin në shtatë deri në nëntë të tilla, ndërsa kërcënimet kanë qenë direkte për jetën e tij dhe të familjes. Meçe ka deklaruar se gjatë mbajtjes peng për afro pesë orë jashtë Tiranës, atij i është thënë shprehimisht: «Nuk dua denoncime ose do të vrasim ty, gruan, motrën e nënën».