Jensen Huang dhe pasuria në lojë pas pranimit të pabesësisë

CEO i Nvidia-s, Jensen Huang, ka pranuar se ka qenë i pabesë ndaj bashkëshortes së tij, Lori Huang, pas 41 vitesh martesë, duke sjellë vëmendjen te pasuria e përbashkët dhe te shifra e përmendur prej 80 miliardë dollarësh në diskutimet online si një skenar i mundshëm ndarjeje.

Sipas vlerësimeve të Forbes, pasuria neto e drejtuesit të gjigantit të teknologjisë arrinte rreth 155 miliardë dollarë më 9 nëntor. Për më tepër, ai bashkëthemeloi Nvidia-n në vitin 1993, tetë vjet pas martesës me Lori Huang, çka nënkupton se një pjesë e konsiderueshme e pasurisë është krijuar gjatë jetës së tyre bashkëshortore.

Në shtetin e Kalifornisë, ku zbatohen rregullat e pronës komunitare, pasuritë e krijuar gjatë martesës konsiderohen pronë e përbashkët dhe ndahen në mënyrë të barabartë në rast divorci, nëse nuk ekzistojnë marrëveshje të vlefshme që përcaktojnë ndryshe. Një marrëveshje paramartesore mund të përcaktojë paraprakisht mënyrën e ndarjes së pasurisë, detyrimeve dhe interesave financiare, ndërsa të njëjtin funksion mund të ketë edhe një marrëveshje pasmartesore e nënshkruar pas martesës.

Edhe pse deri më tani nuk ka asnjë njoftim zyrtar për një ndarje mes çiftit dhe as konfirmim se shuma e lartpërmendur përfaqëson një detyrim real, ngjarje të ngjashme mes miliarderëve, si rastet e Bill dhe Melinda Gates apo Jeff Bezos dhe MacKenzie Scott, kanë dëshmuar se ndarjet e tilla mund të përfshijnë shuma marramendëse.

Për momentin, mbetet e paqartë nëse marrëdhënia e tyre do të përballet me një krizë që përfundon në gjykatë, ndërsa çdo zhvillim i ardhshëm do të ndiqet me vëmendje të madhe për shkak të përmasave të jashtëzakonshme të pasurisë së krijuar ndër vite.