Sa milionë euro humbën shteti dhe qytetarët nga mashtrimi në incenerator?
Pse Prokuroria e Posaçme dërgoi për gjykim Mirel Mërtirin, Klodian Zoton dhe 8 të tjerë?
TIRANË — SPAK ka mbyllur hetimet për inceneratorin e Tiranës dhe ka dërguar për gjykim 10 të pandehur, mes të cilëve drejtuesit e projektit, Mirel Mërtiri dhe Klodian Zoto. Të tjerët janë Dashamir Ymeraj, Arjola Kodra, Denisa Tollkuçi, Elton Bualli, Endrit Habilaj, Renato Nallbani, Giuseppe Ciaffaglione dhe Marc Richard Lappat.
Prokuroria e Posaçme i akuzon për "Mashtrim me pasoja të rënda" dhe "Pastrimi i produkteve të veprës penale", duke theksuar se mashtrimi ka shkaktuar humbje prej 30 milionë euro për shtetin dhe qytetarët. Mërtiri dhe Zoto, të shpallur më parë në kërkim, konsiderohen figurat qendrore të skemës.
Hetimi përfshin një nga rastet më të mëdha të korrupsionit në sektorin e menaxhimit të mbetjeve në Shqipëri. Sipas briefit të mëparshëm të ZHURMA-s, humbjet financiare dhe dëmet mjedisore janë të pakalkulueshme.