Si sheh Ola Sohlström rrugën e Maqedonisë së Veriut drejt BE-së?

SHKUP — Ambasadori i Suedisë në Maqedoninë e Veriut, Ola Sohlström, vlerëson se rruga më e shpejtë drejt anëtarësimit në Bashkimin Evropian kalon përmes reformave të vazhdueshme dhe të thella. Ai thekson se këto procese nuk duhet të perceptohen si detyrime të imponuara nga Brukseli, por si investim për të ardhmen e shtetit.

Në emisionin “Rishtazi” në KohaCast, Sohlström u pyet për skepticizmin e faktorëve politikë lidhur me bllokimet e procesit eurointegrues, përfshirë marrëdhëniet me Bullgarinë dhe ndryshimet kushtetuese. Ambasadori suedez deklaroi se fokusi duhet të mbetet te reformat, duke përmbledhur nevojat e vendit me tre fjalë: reforma, reforma dhe reforma.

Sipas Sohlströmit, në një botë që ndryshon me ritme të shpejta, reformat nuk mund të konsiderohen si procese të përkohshme apo fakultative. Ato janë domosdoshmëri për funksionimin, konkurrueshmërinë dhe qëndrueshmërinë e çdo shteti, pavarësisht presionit të jashtëm apo kërkesave të specifika të integrimit.

Ambasadori theksoi se kërkesat e BE-së për forcimin e institucioneve, përmirësimin e qeverisjes, mbrojtjen e mjedisit dhe sundimin e ligjit janë po ato standarde që kërkojnë investitorët. Institucionet e forta dhe të parashikueshme janë faktor kyç për përmirësimin e klimës së biznesit dhe tërheqjen e kapitalit të huaj.

Sohlström vuri në dukje se kompanitë suedeze dhe nordike i vërtetojnë këto pretendime, pasi theksojnë rëndësinë e këtyre standardeve kur shqyrtojnë mundësitë për investime në vend. Përfitimet nga këto ndryshime nuk kufizohen vetëm në procesin e integrimit, por reflektohen drejtpërdrejt në jetën e përditshme të qytetarëve.

Në fund, ai nënvizoi se nëse këto reforma e afrojnë vendin me Bashkimin Evropian dhe e shkurtojnë rrugën drejt anëtarësimit, kjo është një përfitim i dyfishtë. Për diplomatit suedez, reformat janë mjeti kryesor për të shndërruar detyrimet burokratike në zhvillim ekonomik dhe stabilitet afatgjatë.

Burim: Koha.mk
— Redaksia ZHURMA