Sistemi i sigurisë në trafik, qytetarët kërkojnë vetëdijësim
Kamerat e trafikut evidentojnë shkeljet, por qytetarët shprehen të pasigurt dhe kërkojnë kulturë në komunikacion.
Redaksia ZHURMA · · 2 min lexim
Implementimi i sistemit «Qyteti i Sigurt» ka sjellë kamera që evidentojnë shkeljet e vozitësve në komunikacion, por kjo masë nuk ka mjaftuar që qytetarët të ndjehen të sigurt në rrugë. Qytetarët shprehen se problemet nuk zgjidhen vetëm me gjoba e kamera, duke theksuar se mungon kultura e komunikacionit, infrastruktura e duhur dhe përgjegjësia nga ana e shoferëve që drejtojnë automjetet me shpejtësi të madhe apo lëvizin mbi trotuare.
Sipas Ministrisë së Punëve të Brendshme, sistemi «Qyteti i Sigurt» përfaqëson një segment të rëndësishëm në modernizimin dhe përmirësimin e kontrollit të trafikut, duke mundësuar dokumentimin e kundërvajtjeve dhe veprimin efikas të shërbimeve kompetente. Nga aty theksojnë se qëllimi nuk është vetëm ndëshkimi i shoferëve të papërgjegjshëm, por rritja e ndërgjegjësimit për respektimin e rregullave dhe krijimi i një mjedisi më të sigurt për të gjithë pjesëmarrësit në trafik.
Paralelisht me këtë sistem, autoritetet policore vazhdojnë kontrollet e rregullta me theks te shkeljet që shkaktojnë aksidente, si shpejtësia e lejuar, alkooli, mungesa e patentës, parakalimet e parregullta dhe përdorimi i telefonit celular. Gjatë tri ditëve të fundjavës së kaluar, zyrtarët policorë kanë konstatuar 2.720 kundërvajtje në trafik dhe kanë privuar nga liria 67 persona për drejtim të pakujdesshëm të automjetit.
