Si e shndërroi Serbia stërvitjen e FSK-së në Kroaci në kërcënim ndaj saj?

SLUNJ — Ministri në detyrë i Mbrojtjes së Kosovës, Ejup Maqedonci, mori pjesë në Ditën e Vizitorëve të Shquar në kuadër të stërvitjes ndërkombëtare ushtarake "Combat Power 26", e zhvilluar në poligonin e Slunjit, Kroaci, më 1 korrik.

Megjithatë, Beogradi e shfrytëzoi këtë aktivitet si një tjetër mundësi për të përforcuar narrativën e vet për Kosovën si kërcënim ndaj sigurisë rajonale. Në një artikull të publikuar nga Novosti.rs, stërvitja u paraqit si "provë" e një rreziku të drejtpërdrejtë për Serbinë.

Që në titullin alarmues "Çfarë po përgatitet?", Serbia sugjeron se pjesëmarrja e FSK-së nuk ishte një aktivitet i zakonshëm ushtarak, por pjesë e një strategjie kundër saj. Përdorimi i termave "shteti i rremë" dhe "të ashtuquajturat FSK" synon delegjitimimin e institucioneve të Kosovës.

Kjo narrativë është vazhdimësi e diskursit serb pas nënshkrimit të marrëveshjes së bashkëpunimit në mbrojtje ndërmjet Kosovës, Shqipërisë dhe Kroacisë. Në vend që ta trajtojë atë si një marrëveshje partneriteti, Beogradi e paraqet si krijimin e një aleance ushtarake kundër Serbisë.

Çdo stërvitje e përbashkët ose zhvillim i kapaciteteve të FSK-së futet në këtë kornizë, duke u interpretuar si dëshmi se Serbia po përballet me një kërcënim të ri. Kjo shërben për të justifikuar rritjen e shpenzimeve ushtarake dhe blerjen e sistemeve të reja të armatimit.

Ndërtimi i këtij artikulli synon të ushqejë perceptimin e një "Serbie të rrethuar", e cila, sipas kësaj narrative, duhet të vazhdojë militarizimin për t’u mbrojtur. Kjo strategji i jep legjitimitet politik rritjes së shpenzimeve ushtarake dhe modernizimit të forcave të armatosura serbe.

Përmes këtij framing-u, Novosti.rs nuk raporton thjesht për një stërvitje, por e përdor atë për të përforcuar narrativën se Kosova, në koordinim me Kroacinë dhe Shqipërinë, po ndërton kapacitete që përbëjnë rrezik për Serbinë. Kjo synon të delegjitimojë institucionet e Kosovës dhe të nxisë ndjenjën e pasigurisë në opinionin publik serb.

Burim: Gazeta Dukagjini
— Redaksia ZHURMA