Si po zbaton SPAK rekomandimet e Kuvendit për krimin e organizuar dhe zgjedhjet?

TIRANË — Drejtuesi i SPAK, Klodian Braho, ka prezantuar masat për zbatimin e rekomandimeve të Kuvendit, të cilat përqendrohen në analizën e krimeve të organizuara, masave të sigurimit dhe hetimeve zgjedhore.

Sipas raportit vjetor 2025, SPAK ka ngritur një grup të posaçëm për analizën e grupeve kriminale, në bashkëpunim me institucione të tjera dhe partnerë ndërkombëtarë si OPDAT, ICITAP, FBI dhe EU4LEA II. Dokumenti i Vlerësimit Strategjik të Kërcënimit nga Krimi i Organizuar do të publikohet brenda vitit dhe do të shërbejë si bazë për politikën penale dhe bashkëpunimin ndërmjet agjencive.

Për masat e sigurimit, SPAK po verifikon manualisht të dhënat e periudhës 2021–2025, duke evidentuar çdo kërkesë të Prokurorisë së Posaçme dhe vendimet e gjykatave. Qëllimi është të vlerësohet standardi i kërkimeve dhe të përmirësohet praktika.

Në lidhje me krimet zgjedhore, Braho ka raportuar se gjatë periudhës 2021–2025 janë trajtuar mbi 230 materiale dhe janë nisur mbi 150 procedime penale. Vetëm për zgjedhjet e 11 majit 2025, janë administruar 194 materiale dhe janë nisur 46 procedime, nga të cilat 5 janë dërguar në gjykatë me 9 të pandehur.

Prania e Task-Forcës së SPAK-ut në procesin zgjedhor ka pasur efekt parandalues, duke rritur vëmendjen ndaj përgjegjësisë penale. Analiza e përbashkët me Prokurorinë e Përgjithshme dhe KQZ do të përmirësojë strategjinë ekzistuese dhe protokollet e bashkëpunimit.

Për gjurmimin e pasurive, SPAK po vlerëson përdorimin e teknologjive të avancuara dhe fuqizimin e hetuesve financiarë. Aktualisht, Struktura ka akses në 22 nga 40 databaza shtetërore, ndërsa synohet zgjerimi i këtij aksesi për të përmirësuar hetimet financiare dhe krimet kibernetike.

Braho ka theksuar se këto masa synojnë të rrisin transparencën dhe efektivitetin e institucioneve ligjzbatuese në luftën kundër krimeve të organizuara dhe korrupsionit.

Burim: Euronews Albania
— Redaksia ZHURMA