Si ndryshojnë rregullat e reja të kalimit kufitar për qytetarët shqiptarë?

TIRANË — Këshilli i Ministrave të Shqipërisë ka miratuar një paketë të re dhe të gjithëpërfshirëse rregullash që riformatojnë procedurat e verifikimit në pikat e kalimit kufitar, duke shfuqizuar rregulloret e viteve 2016 dhe 2023 dhe duke bërë një përafrim të rëndësishëm me "Kodin e Kufijve Shengen" të Bashkimit Evropian.

Pjesa më kritike është regjimi i fortifikuar për kalimin e personave nën 18 vjeç. Fëmijët nën 16 vjeç mund të udhëtojnë vetëm të shoqëruar nga një person madhor dhe me një deklaratë noteriale të firmosur nga të dy prindërit (ose prindi me kujdestari ligjore), e cila duhet të jetë dygjuhëshe (shqip dhe anglisht) nëse hartohet jashtë vendit. Grupmosha 16–18 vjeç lejohet të udhëtojë e pashoqëruar (për shembull si vizitor te një i afërm ose për aktivitete kulturore/sportive), por kërkohet sërish deklaratë noteriale ku përcaktohet adresa e saktë e pritësit dhe garancia e mosbraktisjes. Për fëmijët me prindër të divorcuar, shoqëruesi duhet të ketë deklaratën e të dy prindërit ose vendimin e formës së prerë të gjykatës që i jep kujdestarinë; të dhënat e vendimit gjyqësor regjistrohen elektronikisht në sistemin kufitar TIMS.

Vendimi jep Policisë Kufitare kompetenca të zgjeruara për të bllokuar kalimin ndonjë dyshim. Në rast dyshimi, roja kufitare bën një intervistë të shkurtër me shoqëruesin dhe kryen verifikime të imta të dokumenteve për të siguruar se fëmija nuk largohet kundër dëshirës së prindëve, duke parandaluar rrëmbimin ose trafikimin. Nëse konstatohet braktisje në shtet tjetër, njoftohen menjëherë Prokuroria, Agjencia për Mbrojtjen e Fëmijëve dhe autoritetet ndërkombëtare homologe.

Për të përshpejtuar qarkullimin, vendimi specifikon kategoritë që kalojnë me verifikime minimale: krerët e shteteve, qeverive, parlamenteve dhe familjet mbretërore (vetëm bazuar në njoftimin zyrtar); mbajtësit e pasaportave diplomatike dhe anëtarët e organizatave si OKB, BE dhe NATO. Në krizë ose luftë, trupat dhe asetet e NATO-s kalojnë me procedura të përshpejtuara ose përjashtime të plota. Punonjësit e kërkim-shpëtimit, zjarrfikësit dhe policitë në detyrë kanë prioritet absolut. Qytetarët që kalojnë kufirin çdo ditë për punë dhe janë të regjistruar në sistem, shfrytëzojnë verifikime të thjeshtuara.

Rregullat standardezohen sipas mjetit të transportit: në autoveturat pasagjerët qëndrojnë brenda gjatë kontrollit dhe zbresin vetëm nëse ka dyshime për mallra/persona të fshehur, mospërputhje identiteti ose sinjalizime policore. Në autobusë, udhëtarët nënshtrohen verifikimit individual këmbësor në terminale, me prioritet për linjat e rregullta në flukse të larta. Kapitenat e tragetave/kroçerave dorëzojnë listën e pasagjerëve/ekuipazhit të paktën 24 orë para mbërritjes; rrugëtimet e brendshme nuk kontrollohen, ndërkombëtarët shkojnë në korsi të veçanta. Në avione, kontrolli bëhet vetëm në aeroportin e parë të mbërritjes (hyrje) dhe të fundit (dalje); fluturimet private kërkojnë dërgimin e planit të fluturimit dhe identiteteve para nisjes. Në tren, verifikimi mund të ndodhë në stacionin e parë ose gjatë lëvizjes brenda vagonëve për të shmangur vonesat.

Vendimi hyn në fuqi pas botimit në Fletorën Zyrtare, duke detyruar Drejtorinë e Përgjithshme të Policisë së Shtetit të përditësojë menjëherë sistemet kompjuterike dhe udhëzuesit e brendshëm për të gjithë punonjësit në pikat kufitare të Shqipërisë.

*Burim: Lajmi.net*
*— Redaksia ZHURMA*