Shehaj: Të korruptuarit po hanë kokat e tyre, SPAK të hetojë Edi Ramën

Kryetari i Partisë Mundësia, Agron Shehaj, ka reaguar lidhur me përplasjen mes kryeministrit Edi Rama dhe Erion Veliajt. Ky i fundit pretendon se është kërcënuar në qelinë e burgut nga ministri i Drejtësisë, Toni Gogu, me urdhër të kryeministrit. Sipas Shehajt, deklaratat e Veliajt dëshmojnë se kreu i qeverisë është kujdesur më parë për kushtet e tij dhe të familjarëve të tij në burg, ndërsa tani e ka kërcënuar se nuk do të kujdeset më nëse nuk pranon kushtet e tij.

«Ka plasur keq brenda Partisë Socialiste! Po hanë kokat e tyre», u shpreh Shehaj, duke shtuar se regjimi kriminal po shkërmoqet nga brenda. Ai theksoi se SPAK duhet të marrë nën hetim Edi Ramën për të dëshmuar se askush nuk është mbi ligjin dhe se nuk ekziston asnjë vijë e kuqe.