Ndreca: Gogu takoi Veliajn në burgun e Fierit dhe e kërcënoi në emër të Ramës

FIER — Ministri i Drejtësisë, Toni Gogu, ka konfirmuar se të premten më 30 tetor ka takuar kryebashkiakun e arrestuar të Tiranës, Erion Veliaj, në IEVP Fier, por ka përgënjeshtruar pretendimet e avokatit mbrojtës Plarent Ndreca, i cili deklaroi se ministri i ka përcjellë Veliajt porosi dhe kërcënime në emër të kryeministrit Edi Rama.

Kryebashkiaku i Tiranës është transferuar së fundmi në burgun e Fierit. Avokati mbrojtës Plarent Ndreca deklaroi në një prononcim për News 24 se ministri i Drejtësisë ka zhvilluar një vizitë urgjente mbrëmjen e së premtes në dhomën e izolimit të Veliajt. Sipas mbrojtësit, kjo vizitë ka zgjatur pak minuta dhe nuk figuron e regjistruar në fletoren e burgut, ndërsa Veliaj ka mundur të kontaktojë avokatin vetëm mëngjesin e sotëm për t'i kaluar detajet e takimit.

Nga ana tjetër, ministri Toni Gogu ka reaguar në Facebook duke sqaruar se vizita në Fier u krye në kuadër të detyrës së tij shtetërore, për t'u njohur nga afër me kushtet e trajtimit të Veliajt pas ankesave të ngritura publikisht nga mbrojtja e tij. Gogu tha se me Veliajn e lidh një miqësi e hershme dhe se rrethanat e vizitës janë të dokumentuara dhe të verifikueshme, duke u shprehur i befasuar nga pretendimet e publikuara.

Avokati Plarent Ndreca pretendon se ministri i ka kërkuar Veliajt të dorëzojë mandatin, të delegojë pushtetin te emrat e caktuar prej kryeministrit dhe të heqë dorë nga avokati mbrojtës, duke e kërcënuar me transferim te burgu 302 dhe hetime nga SPAK-u për minim të rendit kushtetues.

Në reagimin e tij zyrtar, ministri Toni Gogu deklaroi me shkrim: «Më vjen thellësisht keq për të pavërtetat që janë publikuar sot lidhur me vizitën time në IEVP Fier. Po, e kam takuar Erion Veliajn të premten. Në ushtrim të përgjegjësive të mia si Ministër i Drejtësisë, kam shkuar për t’u njohur me kushtet e trajtimit të tij dhe për të dëgjuar nga ai mbi ankesat e shprehura publikisht nga avokati i tij. Me Erionin më lidh një miqësi shumë e hershme, të cilën e dinë të gjithë. Por dua të jem krejt i qartë: Nuk i gjej dot arsyet pse janë stisur ato të pavërteta dhe nuk dua ta besoj që i ka thënë apo shkruar Erioni. Kush më njeh e di se nuk ka asnjë shans, në këtë botë apo në tjetrën, që unë të shqiptoj “mesazhet” që më janë vënë në gojë. Jam vërtet i befasuar. Kam shkuar për të dëgjuar shqetësimet e një njeriu pas një tymnaje mediatike dhe shqetësimeve të kuptueshme të kujtdo që shqetësohet kur flitet për liri e të drejta. Rrethanat e vizitës janë të dokumentuara dhe të verifikueshme. Për të tjerat, koha dhe e vërteta ecin dorë për dore».