Due: Të respektohet pavarësia e gjyqësorit dhe të kërkohet përgjegjësi

Gjatë raportimit në Këshillin e Sigurimit të OKB-së, Përfaqësuesi Special i Sekretarit të Përgjithshëm dhe shefi i UNMIK-ut, Peter Due, ka theksuar se ndajnë brengosjen e Bashkimit Evropian lidhur me ndryshimet e miratuara në Kuvend për kufizimin e kompetencave të Gjykatës Speciale. Sipas tij, procedurat gjyqësore kërkojnë respektimin e integritetit dhe pavarësisë, ndërsa ka njoftuar se një aktgjykim tjetër për administrimin e drejtësisë pritet të jepet më 17 nëntor.

Due ka përmendur se pas vendimit të 16 shtatorit të Dhomave të Specializuara, ku u dënuan Hashim Thaçi dhe tre ish-komandantë për krime lufte, u organizuan demonstrata që zgjatën 21 ditë dhe ishin përgjithësisht paqësore. Megjithatë, ai ka kritikuar Policinë e Kosovës se nuk ka ndarë mjaftueshëm informata me Kombet e Bashkuara gjatë kësaj periudhe, ndonëse bashkëpunimi me partnerët e tjerë ndërkombëtarë ka qenë ndryshe.

Në raportimin e tij, shefi i UNMIK-ut ka bërë thirrje për bashkëpunim të plotë mes autoriteteve në Kosovë dhe Serbi për të siguruar përgjegjësi për sulmin në Banjskë dhe atë ndaj kanalit të Ibër-Lepencit. Krahas kësaj, ai ka trajtuar edhe çështje të tjera të sigurisë dhe të drejtave, përfshirë zgjedhjet e 7 qershorit, shqetësimet për pronat në veri, hetimet e Inspektoratit pas ngjarjeve të 28 qershorit në Gazimestan, si dhe sfidat me të cilat ballafaqohen institucionet serbe në shëndetësi e arsim.