Koçiu: Më iku truri kur pashë vajzën përballë policëve me skafandra

Përmes një reagimi publik në rrjetet sociale, kinematografi Mishel Koçiu ka bërë publike ndjenjat e tij të përziera mes krenarisë dhe shqetësimit prindëror, pasi vajza e tij u rreshtua në vijën e parë të protestave të të rinjve në kryeqytet, përballë efektivëve të rendit.

Ndërsa protestat në Tiranë janë shoqëruar me përplasje dhe tensione, ai ka adresuar kritika të forta ndaj autoriteteve dhe mënyrës se afrimit të pushtetit me brezin e ri, duke theksuar se institucionet shtetërore duhet t'i prisnin të rinjtë për t'i dëgjuar dhe jo me pajisje sigurie e mjete të dhunshme. «Taksirati që shokët e brezit tim ëndërrimtar, tashmë në pushtet, në vend që t’ju shtronin tapetin e kuq e t’ju prisnin me banda muzikore në dyert e zyrave të shtetit, për t’ju dëgjuar mendimet e shqetësimet, zgjodhën t’ju presin me policë me skafandra, shkopinj gome, gaz lotsjellës e plumba gome», shprehet ndër të tjera ai.

Duke kërkuar kujdes të shtuar nga e bijë, ai ka vënë në dukje se shoqëria ka nevojë për vlera të mirësisë e dinjitetit, ndërkohë që shfaqet i habitur se brezi i ri po detyrohet të përballet përsëri në rrugë me sfida që dikur mendoheshin të lëna pas.