Gashi viziton tri prokurori dhe kërkon llogaridhënie e efikasitet

PRISHTINË — Kryeprokurori i Shtetit, Zejnulla Gashi, ka vizituar të martën Prokurorinë e Apelit, Prokurorinë Speciale të Kosovës dhe Prokurorinë Themelore në Prishtinë, me ç'rast ka kërkuar rritjen e efikasitetit, profesionalizmit dhe llogaridhënies nga prokurorët. Në këto takime ai shoqërohej nga zëvendëskryeprokurori i Shtetit, Bahri Hyseni, si dhe drejtori i përgjithshëm i Sekretariatit të Këshillit Prokurorial të Kosovës, Sami Istrefi.

Këto vizita zyrtare janë zhvilluar në kuadër të një nisme më të gjerë të Kryeprokurorit të Shtetit për të vizituar secilën prokurori në të gjithë vendin. Qëllimi kryesor i kësaj nisme lidhet me dëgjimin e drejtpërdrejtë të prokurorëve për sfidat e punës së përditshme, si dhe me identifikimin e problematikave dhe nevojave profesionale me synim forcimin e funksionimit të sistemit prokurorial dhe të sundimit të ligjit.

Gjatë takimeve me prokurorët, Gashi ka shpalosur masat dhe veprimet e ndërmarra prej emërimit të tij në këtë pozitë, duke u përqendruar te krijimi i mekanizmave që rrisin cilësinë e punës dhe konsolidojnë integritetin e prokurorëve të shtetit. Ai ka theksuar se adresimi i nevojave dhe i problemeve profesionale mbetet i rëndësishëm për të ofruar zgjidhje institucionale, ndërsa u ka ofruar mbështetje të parezervë zyrtarëve në përmbushjen e mandatit të tyre kushtetues dhe ligjor. Po ashtu, sipas njoftimit zyrtar, kryeprokurori ka kërkuar përgjegjshmëri më të madhe dhe rezultate konkrete në punën e tyre.

Udhëheqësi i prokurorisë ka bërë të ditur synimin për vazhdimin e vizitave në organet e tjera të akuzës në të gjithë territorin e Kosovës.

“Qëllimi i këtyre vizitave ka qenë dëgjimi i drejtpërdrejtë i prokurorëve të shtetit lidhur me sfidat konkrete me të cilat përballen në punën e tyre të përditshme, si dhe identifikimi i problematikave dhe nevojave profesionale, me synim adresimin e tyre dhe ofrimin e zgjidhjeve përkatëse institucionale”, thuhet në njoftim.