Kosova dhe Austria paraqesin marrëveshjen për bashkëpunim gjyqësor

Republika e Kosovës dhe Republika Federale e Austrisë kanë paraqitur Marrëveshjen për Bashkëpunim Gjyqësor në Çështjet Penale. Marrëveshja synon krijimin e një kornize ligjore të qartë për lehtësimin dhe avancimin e bashkëpunimit gjyqësor ndërkombëtar ndërmjet dy vendeve. Fushëveprimi i saj përfshin ekstradimin, ndihmën juridike ndërsjellë, transferimin e personave të dënuar dhe forma të tjera të bashkëpunimit gjyqësor, me qëllim të rritjes së efikasitetit në trajtimin e kërkesave dhe procedurave përkatëse.

Ministria e Drejtësisë e Kosovës vlerëson se finalizimi i marrëveshjes përbën një hap të rëndësishëm në thellimin e bashkëpunimit ndërmjet dy vendeve, si dhe në forcimin e përpjekjeve të përbashkëta për parandalimin dhe luftimin e krimit ndërkufitar dhe transnacional.