Shasivari kërkon përvojën sllovake për reformat në drejtësi

SHKUP — Ministri i Drejtësisë, Jeton Shasivari, ka pritur në takim ambasadorën e Republikës së Sllovakisë, Iveta Hricova, ku u diskutua për përshpejtimin e reformave përmes përvojës sllovake. Shasivari vuri theksin te rëndësia e procesit të integrimit evropian të Maqedonisë së Veriut dhe mbështetja që vjen nga Sllovakia në këtë rrugëtim.

Sipas ministrit, Asociacioni Sllovak për Politikë të Jashtme ka dhënë kontribut të çmueshëm në zhvillimin e Konventës Kombëtare për Bashkimin Evropian. Ky forum shërben si një platformë e hapur për dialog transparent rreth negociatave aderuese të Shkupit dhe krijimit të një konsensusi të gjerë shoqëror për reformat e kërkuara nga Brukseli.

Palët u dakorduan që bashkëpunimi ndërmjet Ministrisë së Drejtësisë dhe institucioneve sllovake të vazhdojë edhe në të ardhmen për të forcuar perspektivën evropiane të vendit. Sllovakia shihet si një model i suksesshëm për zbatimin e praktikave që lehtësojnë afrimin e shtetit me strukturat e Bashkimit Evropian.

Burim: Tetova Sot
— Redaksia ZHURMA