Senati amerikan konfirmon Eric Wendt si ambasador në Shqipëri
Gjenerali në pension u miratua me 51 vota pro si pjesë e një pakete prej 74 emërimesh shtetërore.
UASHINGTON — Senati i Shteteve të Bashkuara ka konfirmuar gjeneralin në pension Eric Wendt si ambasadorin e ardhshëm në Shqipëri. Njoftimi u bë i ditur nga njohësi i çështjeve politike dhe të sigurisë së SHBA-së, Adrian Shtuni, përmes një postimi në rrjetin social Facebook.
Miratimi u bë gjatë seancës së sotme si pjesë e një pakete prej 74 emërimesh të miratuara në bllok, bazuar në Rezolutën numër 817 të Senatit amerikan. Ky vendim mori dritën jeshile me një rezultat prej 51 votash pro dhe 47 kundër.
Burim: Gazeta Express, https://www.gazetaexpress.com/senati-i-shba-se-konfirmon-eric-wendt-si-ambasadorin-e-ri-ne-shqiperi/
— Redaksia ZHURMA
