Maliqi kërkon kallëzim penal në Supreme ndaj Kurtit e Haxhiut
Analisti u bëri thirrje shumicës prej më shumë se 80 deputetëve që të mos i dërgojnë më ankesat në Gjykatën Kushtetuese.
PRISHTINË — Njohësi i çështjeve politike, Shkelzen Maliqi, ka kërkuar që deputetët të mos i dërgojnë më në Gjykatën Kushtetuese kallëzimet për cenim të rendit kushtetues. Ai ka propozuar që shumica prej mbi 80 deputetëve t’i drejtohet Gjykatës Supreme me një kallëzim penal për krim të rëndë të përsëritur ndaj kryeministrit Albin Kurti dhe ministres Albulena Haxhiu.
Ky reagim vjen në kohën e tensionuar politike në vend, kur vazhdimi i seancës konstituive është thirrur për të shtunën. Maliqi ka argumentuar se Gjykata Kushtetuese i ka dhënë tashmë verdiktet e saj për shkeljet e ligjeve, prandaj deputetët duhet t’i drejtohen Gjykatës Supreme si një institucion i pavarur juridik kompetent për të marrë vendime ekzekutive.
Sipas tij, edhe prokuroria do të duhej të hapte menjëherë procedurën penale për krim të rëndë kundër Republikës. Maliqi theksoi se kjo gjykatë është një institucion kompetent për të vlerësuar karakterin e krimit të pretenduar dhe për të marrë verdikte ekzekutive për këtë çështje.
Burim: Epoka e Re
— Redaksia ZHURMA