Sekuestrohen mbi 1.5 milion euro dhe ari në operacionin ndërkombëtar
Operacioni i gjerë antimafia çoi në arrestimin e gjashtë personave dhe identifikimin e 52 të tjerëve nën hetim.
Redaksia ZHURMA · · 1 min lexim
Autoritetet italiane kanë vënë në pranga gjashtë persona dhe kanë identifikuar 52 të tjerë nën hetim në kuadër të operacionit të koduar «Caveau 38», i cili goditi një organizatë kriminale të përbërë kryesisht nga shtetas shqiptarë. Gjatë këtij aksioni të gjerë antimafia, forcat e rendit kanë sekuestruar mbi 1.5 milion euro para të gatshme dhe rreth 32 kilogramë lëndë narkotike, mes të cilave kokainë, heroinë dhe kanabis.
Hetimet e zhvilluara nga Guardia di Finanza në Lecco, nën drejtimin e Drejtorisë së Antimafias në Milano dhe në bashkëpunim me hetuesit e SPAK-ut në Tiranë, zbuluan se rrjeti dyshohet se ka trafikuar rreth 240 kilogramë kokainë nga Shqipëria drejt Italisë gjatë viteve 2019–2022. Për më tepër, skema përfshinte pastrimin e mbi 14 milionë eurove përmes investimeve, blerjes së afro tetë kilogramëve lingota ari dhe përdorimit të automjeteve e kamionëve të përshtatur me hapësira të fshehta për transport.
