Seanca në GJKKO për Veliajn dhe Xoxën pas shtyrjes nga mungesa e avokatëve

Në Gjykatën e Posaçme po zhvillohet seanca e radhës për kryebashkiakun Erion Veliaj dhe bashkëshorten e tij, Ajola Xoxa. Më parë, seanca e parashikuar u shty për shkak të mungesës së avokatëve në sallë, pasi nuk u paraqitën as mbrojtësit e caktuar nga skema e ndihmës juridike falas të kërkuar nga gjykata. Përmes një kërkese të posaçme, Veliaj ka bërë të qartë se dëshiron të përfaqësohet vetëm nga avokati Plarent Ndreca, duke refuzuar alternativën e mbrojtjes së caktuar nga trupa gjykuese.

Situata është shoqëruar me tensione lidhur me kushtet dhe lëvizjet e kryebashkiakut në paraburgim. Më 28 tetor, Veliaj u transferua nga Durrësi në burgun e Fierit me vendim të Drejtorisë së Përgjithshme të Burgjeve, veprim që solli reagime nga pala mbrojtëse dhe brenda socialistëve. Ndreca ka kundërshtuar mënyrën e transferimit dhe kushtet, duke denoncuar se është penguar të takohet me klienti jashtë orarit zyrtar dhe duke paralajmëruar kallëzim penal. Nga ana e tij, Veliaj ka publikuar një letër nga qelia ku pretendon se gjatë një takimi me ministrin e Drejtësisë, Toni Gogu, i janë përcjellë kërkesa në emër të kryeministrit Rama, përfshirë dorëheqjen nga Bashkia e Tiranës dhe heqjen dorë nga avokati i tij, pretendime të cilat Gogu i ka mohuar duke deklaruar se vizita kishte qëllim njohjen me kushtet e trajtimit.