Çfarë vizioni paraqiti Schieder për Shqipërinë në PE?

STRASBURG — Gjatë seancës plenare të Parlamentit Evropian mbi të ardhmen evropiane të Ballkanit Perëndimor, eurodeputeti austriak Andreas Schieder vlerësoi progresin e Shqipërisë, duke e cilësuar vendin si një nga kandidatët më të avancuar në procesin e zgjerimit të BE-së.

Schieder theksoi se Shqipëria tashmë ka "një këmbë në kampin evropian", duke nënvizuar mbështetjen e gjerë publike dhe politike për integrimin. Sipas tij, mbi 90 për qind e qytetarëve shqiptarë mbështesin anëtarësimin, ndërsa objektivi për të përfunduar negociatat deri në fund të vitit 2026 është tashmë një perspektivë realiste.

"Hapja e të gjitha grupkapitujve të negociatave brenda 13 muajve dëshmon vullnetin politik për të çuar përpara reformat", deklaroi Schieder, i cili vlerësoi gjithashtu përparimin në luftën kundër korrupsionit dhe miratimin e legjislacionit për mbrojtjen e sinjalizuesve. Ai theksoi se turizmi i qëndrueshëm është "e vetmja rrugë përpara" për krijimin e vendeve të punës.

Si raportues për Shqipërinë, Schieder tha se gjatë vizitave të shumta ka vërejtur "një nivel të lartë optimizmi dhe angazhimi" nga institucionet, shoqëria civile dhe qytetarët. "Shqipëria mund të jetë historia e ardhshme e suksesit të zgjerimit të Bashkimit Evropian", përfundoi ai.

Burim: Telegrafi
— Redaksia ZHURMA